Маҳфуза Мадумарова Балиқчи тумани тиббиёт бирлашмасига қарашли Чинобод марказий поликлиникаси кардиология бўлими ҳамшираси вазифасида ишлай туриб, иш жойидан мўмай пул орттириш мақсадида фойдаланди.

Таниши Х.Муллажонованинг ўзи каби оқ либосда ишлаш нияти борлигини билиб, бунинг харажати борлигини айтди. Х.Муллажонова ишга кириш учун ҳар қандай харажатга тайёрлигини билдирганида 300 АҚШ доллари топиб, тиббиёт бирлашмаси бошлиғи номига ишга кириш ҳақидаги ариза билан бирга олиб келишини, танишлари орқали икки ойда ишга киритиб қўйишини маълум қилди.

2021 йил 3 май куни соат 11 да М.Мадумарова ишхонада ўз ишларини бажариб юрганида Х.Муллажонова унинг олдига келди. М.Мадумарова унга поликлиника биносининг орқасига ўтишини ишора қилди-да, ўзи ҳам ортидан борди. Ўша ерда талабгор 300 долларни узатди, «ҳожатбарор» уни олди. Бу орада шу жойга ҳуқуқни муҳофаза қилувчи идора ходимлари келиб ўзларини таништирганида М.Мадумарова ўзининг жинояти фош этилганини тушуниб етди.

Суднинг ҳукми билан М.Мадумаровага қилмишига яраша жазо тайинланди.