Конституциямиз қабул қилинган қутлуғ сана арафасида юртимиз бўйлаб савобли амаллар кенг қанот ёзди. Жумладан, Мажбурий ижро бюроси Сурхондарё вилояти бошқармаси ходимлари соҳада узоқ йил меҳнат қилиб, пенсияга кузатилган марҳум Шербой Маматовнинг хонадонида бўлиб, яқинлари ҳолидан хабар олди. Унинг яхши фазилатлари, касбига меҳри ва устозлик маҳоратини эслаб, оила аъзолари билан дилдан суҳбат қурди, совғалар улашди.

Ш.Маматов прокуратура органларидаги фаолиятини 2000 йилда Шўрчи тумани прокуратураси ҳузуридаги солиққа оид жиноятларга қарши курашиш бўлими инспекторлигидан бош­лаб, турли лавозимларда хизмат қилган.

Олтмиш бир ёшида оламдан ўтган Шербой Маматов 2017 йил Бош прокуратура ҳузуридаги Мажбурий ижро бюросининг Шеробод тумани бўлими бошлиғи лавозимида ишлаб, 2019 йилда бюронинг Термиз шаҳар бўлими бошлиқлигидан пенсияга кузатилган. Дилкаш инсон, қатъиятли раҳбар, яқин маслаҳатгўй сифатида ҳамкасблари хотирасида унутилмас из қолдирган. Шогирдларига касбини сидқидилдан севишни, барча билан бирдай хушмуомала бўлишни, оиласини қадрлашни ўргатган. Шу боис соҳа ходимлари марҳум устозини тез-тез эслаб, яқинларининг ҳолидан хабар олиб туради.

Халқимизга хос бундай ажойиб фазилат мамлакатимизда инсон қадри нақадар улуғлигидан далолат бериши баробарида ёш авлод қалбида кексаларга иззат, аждодлар руҳига ҳурмат туйғусини юксалтиришга хизмат қилиши билан ҳам аҳамиятлидир.