Ўзбекистон Республикаси Конституциясининг 64-моддасига кўра, ота-оналар ўз фарзандларини вояга етгунларига қадар боқиш ва тарбиялашга мажбурдирлар.

Болаларнинг ушбу кафолатланган ҳуқуқларини таъминлашда Бош прокуратура ҳузуридаги Мажбурий ижро бюроси органлари томонидан бир қатор ишлар амалга оширилмоқда.

Хусусан, бугунги кун ҳолатига Мажбурий ижро бюроси Фарғона вилоят бошқармасининг ҳудудий бўлимлари иш юритувида 35 мингдан ортиқ алимент билан боғлиқ ижро ҳужжатлари мавжуд.

Бугунги кунга қадар алимент ундиришга оид бўлган 7 мингдан ортиқ ижро ҳужжатлари бўйича ижро ҳаракатлари тамомланиб, вояга етмаганлар фойдасига 128 млрд. сўмдан ортиқ алимент пуллари ундирилиши таъминланган.

Ишсиз алимент тўловчиларни ишга жойлаштириш орқали болаларнинг ҳуқуқларини таъминлаш мақсадида, сектор раҳбарлари билан ҳамкорликда ташкил этилган меҳнат ярмаркаларида 2 минг нафарга яқин ишсизлар бандлиги таъминланган.

Шу билан бирга, бошқарма томонидан 1.368 та дарз кетган оилалар яраштирилиб, болалар ота-она қармоғига қайтарилган.