“Ишқий суратларимни эримга жўнатувдим…”

12:30 - 30.08.2021

21

Беҳаё “селфи”лар билан боғлиқ ҳолатлар шу селфи қаҳрамонларининг ўзининг бошига бало бўлмоқда. 31 ёшли аёл Н.И. бегоналарга эмас ўз турмуш ўртоғига “селфи” тушган расмларини жўнатиб, оқибатда сарсон бўлади. Аниқланишича, аёл ўз турмуш ўртоғига ишдалик пайтида уни соғиниб, ўзининг беҳаё тарзда тушган суратларини телеграмм тармоғи орқали жўнатиб туради. Орадан маълум вақт ўтгач, сим карта ишламай қолади. Н.И. бошқа рақам олиб фойдаланаверади.

Орадан бир неча ой ўтгач, унинг ишлатилмаётган рақами компания томонидан захирага қайтарилади. Шундан сўнг сотувга чиқарилиб, бошқа шахсга бериб юборилади. Аввал аёл фойдаланган рақамнинг янги эгаси 25 ёшли Б.Т. уни телеграмм тармоғига улаганида Н.И.нинг турмуш ўртоғи билан ишқий ёзишмалари ва беҳаё суратлари чиқиб келади. Чунки аёл эски рақамини телеграмм тармоғидан ўчириб ташламаган экан. Бу эса йигитга қўл келиб, аёлни ижтимоий тармоқлардан қидириб топади ва унга товламачилик қила бошлайди. Яъни аёлнинг беҳаё суратларини тарқатмаслик учун ундан бир йил ичида қимматбаҳо буюмлар, тилла тақинчоқлар ва пул ундиради. Аммо шу билан ҳам қаноатланмайди. Пичоқ суякка қадалган Н.И. эса ҳуқуқ-тартибот идораларига ариза ёзишга мажбур бўлади. Б.Т. қўлга олиниб, қилмиши учун жазосини олди, лекин аёл беҳаё “селфи”лари учун қанча вақт хотиржамлигини йўқотганини тасаввур қилиш қийин.