Тезкор вакил тезкор тадбирда ушланди

15:30 - 25.05.2021

19

Янгийўл тумани ИИБ жиноят қидирув гуруҳи тезкор вакили Мели Қобилов (исм-фамилиялари ўзгартирилган) Транспорт вазирлигида ишловчи танишлари орқали Илҳом Обрўевни 50 минг доллар эвазига «Chinobod neft bazasi» МЧЖнинг «Роҳат» филиалига раҳбар қилиб ишга жойлаштириб қўйишга ваъда беради. И.Обрўевни бунга ишонтирган ички ишлар ходими хизмат ҳақи учун олдиндан 10 минг АҚШ доллари беришни сўрайди.

Дастлаб 10 минг долларни қўлга киритган М.Қобилов пулни сарфлаб юборади. Берган ваъдасини эса унутади. Иш нима бўлганини сўраб қўнғироқ қилган И.Обрўевга эса турли баҳоналарни рўкач қилаверади. Орадан бир неча ой ўтгач Илҳомнинг сабри тугайди ва Мелидан пулини қайтаришни талаб қилади. Шундан сўнг М.Қобилов берган аванси камлик қилаётгани, яна 10 минг берса, иши битишини айтади. Бу сафар И.Обрўев унинг гапига ишонмайди ва мазкур ҳолат бўйича тегишли жойга ариза билан мурожаат қилади. Департаментнинг Тошкент вилояти бошқармаси ходимлари ўтказган тадбирда М.Қобилов жабрланувчидан талаб қилинган пулни олган вақтида ушланди ва суд ҳукми билан 6 йилга озодликдан маҳрум этилди.