Табиркорлик соҳасида кенг имконият яратилаётган бир пайтда айрим фуқароларимизнинг қонунга хилоф равишда инсон саломатлиги учун хавфли бўлган спиртли ичимликларни ишлаб чиқариши ва сотиши ачинарли ҳол. Қўшкўпир туманида яшовчи Ш.К. ҳам осон пул топишни мақсад қилади.

Департаментнинг Хоразм вилояти бошқармаси ходимлари ўтказган тадбирда қўштирноқ ичидаги тадбиркорнинг жинояти фош бўлди. Қўшкўпир туманида яшовчи Ш.К. 0,45 литр сиғимга эга бўлган 2400 шиша спиртли ичимликларни хеч қандай ҳужжатларсиз 34 миллион сўмга ҳисоблаб, Урганч шаҳрида яшовчи М.С.га 3300 АҚШ долларига сотаётган вақтда ашёвий далиллар билан ушланди.

«Uztest» DUK Хоразм филиалининг хулосасига кўра «Qarataw» ёзувли идишлардаги ароқнинг истеъмолга яроқсизлиги, давлат стандарти ҳамда истеъмолчилар ҳаёти ва соғлиғи талабларига жавоб бермаслиги аниқланган. Мазкур ҳолат юзасидан Ш.К.га нисбатан жиноят иши қўзғатилиб, тергов ўтказилмоқда.

Ҳар бир фуқаро тадбиркорлик соҳасида халол ва қонуний фаолият юритсагина ишида унум бўлади. Эгри йўлни танлаганлар қонун олдида жавоб беришга мажбур.w