Билиб-билмай жиноят қилган ва панжара ортига тушгач афсус-надоматда ёнганлар оз эмас. Аммо маҳкумлик — бутунлай зулматда қолиш дегани эмас.

Фарғона вилояти прокуратураси ҳуқуқни муҳофаза қилувчи бошқа органлар билан ҳамкорликда жиноят ва ҳуқуқбузарликлар профилактикасини кучайтирмоқда. Жиноятга мойил шахслар билан алоҳида иш юритилаётир.  Жиноятни келтириб чиқарувчи омилларни бартараф этишга урғу берилмоқда. Жазони ўтаб қайтганлар ишга жойлаштириляпти. Вилоят прокуратураси томонидан пробация ҳисобида турган 42 киши ишга жойлаштирилди.

Жойларда ташкил қилинаётган сайёр судларда ахлоқан тузалиш йўлига ўтиб жазони ўташ талабларига амал қилиб келганлар шартли озод қилинмоқда ва, аксинча, ушбу талабларни менсимаган маҳкумларга қонуний чоралар кўрилмоқда. Хусусан, суд ҳукмида белгиланган талабларга қатъий риоя этиб, ҳалол ишлаган 52 нафар маҳкум муддатидан аввал шартли равишда озод қилинди. Жазони ўташ тартибига бўйсунмай келган 24 нафар маҳкумнинг жазоси оғирроғига алмаштирилди.