Жиноят ёш, миллат, жой танламагани сингари соҳа ҳам танламайди. Коррупция ҳақида гап кетганда бу яққол кўзга ташланади.

Лазиз Қиличев Бухоро вилояти экология ва атроф-муҳитни муҳофаза қилиш бошқармасининг сув ва ер ресурсларини муҳофаза қилиш бўлими бошлиғи лавозимида ишлаб келиб, хизмат мавқеидан ғараз нияти учун фойдаланди. У маъмурий ҳуқуқбузарлик тўғрисидаги ҳужжатларни тайёрлашда иштирок этиш, қонунда белгиланган тартибда мансабдор ва фуқароларни жаримага тортиш ваколатига эга. Лазиз Қиличев тамагирлик қилиш учун айнан шу ваколатидан фойдаланди. Жўйизар каналидан қонунга хилоф тарзда балиқ овлаётган Дилшод Зарипов ҳақидаги маълумотни эшитгач, фурсатни бой бермай унинг олдига етиб борди.

Ўртоқлари билан балиқ овига борган Дилшод Зарипов қилаётган иши қонунга хилофлигини билмагани учун ҳам бепарво эди. Ўзини экология идораси ходими деб таништирган киши бу қилмиши қонун билан жазоланадиган бўлса  5 миллион сўм жарима тўлашини айтди.

«Ҳужжатларни расмийлаштириб, баёнларни тайёрлаймиз» деб қонунбузарларни тартибга чақирган Лазиз Қиличев эртаси куни Экология ва табиатни муҳофаза қилиш идорасида балиқ овчиларини кўриб қолди.

– Менинг олдимга биттанг кир, – деди.

– Акажон, биз билмабмиз. Бир ёрдам қилинг энди.

– Ёрдам. Ҳозир… Демак, 2 миллион сўм бўлади, – деди жаримани чамалаб чиққан Л.Қиличев. – Сиз менга 1 миллион 500 минг сўм бериб кетаверинг. Бошқасига ишингиз бўлмасин. Керак бўлса ҳужжатларни йўқ қилиб юбораман…

Ия, буёғи қандоқ бўлди? Келишилгандек айтилган пул келди, бироқ Лазиз Қиличев домга тушган қушдек қонун қармоғига илинди.