Бугунги кунда уч-тўрт сўм пул топиш учун қонунни бузишдан ҳам тап тортмайдиган одамлар тоифаси пайдо бўлган. Гап охир-оқибатда аҳоли, айниқса болаларнинг соғлиғига зиён етказиши мумкин бўлган пиротехника савдоси ҳақида кетмоқда.

Бош прокуратура ҳузуридаги Иқтисодий жиноятларга қарши курашиш департаментининг Фарғона вилояти бошқармаси ходимлари ДХХ Фарғона вилояти бошқармаси билан ҳамкорликда 15 декабрь куни тадбир ўтказди. Унда Фарғона туманида яшовчи Ф.С., Д.Қ, А.С. ва У.О. жиноий тил бириктириб, Хитойда ишлаб чиқарилган «Британик» номли пиротехниканинг ҳар қутисини 240 АҚШ долларидан ҳисоблаб, ўн қути пиротехникани Новкент қишлоғида махсус харидорга 2400 долларга сотган вақтида ашёвий далиллар билан ушланди ва пиротехникалар ашёвий далил сифатида олинди. Ҳозир ушбу ҳолат бўйича департаментининг Фарғона вилояти бошқармаси томонидан Ф.С., Д.Қ, А.С. ва У.О.га нисбатан жиноят иши қўзғатилган.