Фуқаро Г.С.нинг бир ярим яшар боласини сотиш  ҳақидаги режасидан ҳуқуқни муҳофаза қилувчи ор­ганлар ходимлари хабар топишди. Махсус харидор топилиб, Г.С. билан алоқага чиқилди.

– Нима учун сотмоқчисиз болангизни? Соғми ишқилиб?

– Ўғлим соппа-соғ. Отаси Россияга ишлагани кетган. Пул жўнатмайди. Ёлғиз бошимга ижара ҳақи, кредит тўловлари…

– Тушунарли. Қанчага берасиз?

– Бир ярим минг долларга.

– Бўпти, айтганингизга оламан. Фақат олдинига беш юз, қолганини кейин бераман, – деди харидор.

Г.С. унинг шартига кўнди. Улар 2020 йилнинг 1 сентябрь куни Фарғона шаҳрида кўришишди. Г.С. боласини харидорга бериб пулни олди, аммо хурсандчилиги узоққа чўзилмади. У жиноят устида ушланди.

Маълум бўлишича, яқинлари таълим-тарбия­сини ўз ҳолига ташлаб қўйган қиз турмушга чиқ­масдан ҳомиладор бўлган. 2019 йилнинг 27 март куни ўғил фарзанд кўрган.

Боласини бир буюм каби сотган, инсоний қиё­фасини йўқотган аёл судда қилмишига тўлиқ иқрор бўлди. Унинг чақалоғи гўдаклар уйига топширилди. Одам савдосига қўл урган Г.С. уч йилга озодликдан маҳрум этилди.